फलटण ग्रामीण पोलिसांची उल्लेखनीय कामगिरी; राज्याबाहेर गेलेल्या मोबाईलचाही तांत्रिक तपासातून शोध
राजकारण मीडिया:फलटण: दिनांक: 05/10/2026:प्रभाकर करचे | हरविलेल्या तसेच चोरीस गेलेल्या मोबाईल फोनचा शोध घेण्यासाठी पोलिस विभागाकडून राबविण्यात येत असलेल्या Central Equipment Identity Register (CEIR) प्रणालीचा प्रभावी वापर करत फलटण ग्रामीण पोलिसांनी तब्बल ७१ मोबाईल फोन शोधून हस्तगत केले आहेत. या मोबाईलची अंदाजे बाजारातील किंमत १२ लाख ८० हजार रुपये असल्याची माहिती पोलिसांनी दिली आहे.
फलटण ग्रामीण पोलीस ठाण्याच्या हद्दीत मोबाईल हरविल्याबाबत मोठ्या प्रमाणात तक्रारी प्राप्त झाल्यानंतर पोलीस अधीक्षक, सातारा यांच्या मार्गदर्शनाखाली सर्व पोलीस ठाण्यांना CEIR पोर्टलच्या माध्यमातून मोबाईल शोध मोहीम राबविण्याच्या सूचना देण्यात आल्या होत्या.
त्यानुसार प्राप्त तक्रारी CEIR पोर्टलवर अद्ययावत करण्यात आल्या. त्यानंतर तांत्रिक विश्लेषणाच्या आधारे संबंधित मोबाईल कोणत्या ठिकाणी आणि कोणत्या सिमकार्डवर वापरला जात आहे, याचा मागोवा घेण्यात आला. तपासादरम्यान काही मोबाईल सातारा जिल्ह्याबाहेर तसेच कर्नाटक, मध्य प्रदेश आणि उत्तर प्रदेश आदी राज्यांमध्ये वापरले जात असल्याचे निदर्शनास आले.
पोलिसांनी संबंधित मोबाईल वापरकर्त्यांशी संपर्क साधून त्यांना कायदेशीर बाबींची माहिती दिली. त्यानंतर काही मोबाईल कुरिअरद्वारे परत मिळविण्यात आले, तर काही मोबाईल प्रत्यक्ष ताब्यात घेण्यात आले. ज्या तक्रारदारांचे मोबाईल लांब अंतरावर असल्याने पोलीस ठाण्यात येणे शक्य नव्हते, त्यांच्याकडून कुरिअरद्वारे मोबाईल परत मिळविण्याची कार्यवाही करण्यात आली.
सप्टेंबर २०२६ अखेरपर्यंत एकूण ७१ मोबाईल फोन हस्तगत करण्यात फलटण ग्रामीण पोलिसांना यश आले असून, त्यांची अंदाजे किंमत १२ लाख ८० हजार रुपये आहे.
तांत्रिक तपासाला ‘मैदानी’ पोलिसिंगची जोड
मोबाईल हरविल्यानंतर तक्रार दाखल करून प्रकरण थंडावते, अशी सर्वसाधारण धारणा असताना फलटण ग्रामीण पोलिसांनी तांत्रिक तपास, CEIR पोर्टलवरील माहितीचे विश्लेषण आणि प्रत्यक्ष पाठपुरावा यांचा समन्वय साधत हरविलेल्या मोबाईलचा शोध घेण्याची कार्यवाही केली. त्यामुळे तक्रारदारांना त्यांचे मोबाईल परत मिळण्याचा मार्ग मोकळा झाला आहे.
ही कारवाई पोलीस अधीक्षक सो निखिल पिंगळे, अपर पोलीस अधीक्षक वैशाली कडूकर, फलटण विभागाचे पोलीस उपअधीक्षक सो. धन्यकुमार गोडसे यांच्या मार्गदर्शनाखाली करण्यात आली.
या मोहिमेत सहाय्यक पोलीस निरीक्षक प्रशांत सुबनावळ, पोलीस निरीक्षक डी. बी. पथकाचे पो.उप.नि. दीपक पवार, CEIR पोर्टलचे काम पाहणारे कर्मचारी श्रीनाथ कदम तसेच पो.हवा. नितीन चतूरे, अमोल जगदाळे व हनुमंत दडस यांनी सहभाग घेतला.
हरवला मोबाईल? तक्रार करून थांबू नका!
पोलिसांच्या या कारवाईमुळे मोबाईल हरविल्यानंतर तक्रार नोंदविणे, IMEI क्रमांकाची माहिती देणे आणि CEIR प्रणालीचा वापर करून त्याचा तांत्रिक मागोवा घेणे किती महत्त्वाचे आहे, हे पुन्हा अधोरेखित झाले आहे.
फलटण ग्रामीण पोलिसांची ही कामगिरी केवळ ७१ मोबाईल परत मिळविण्यापुरती मर्यादित नसून, तंत्रज्ञानाचा प्रभावी वापर करून नागरिकांच्या मालमत्तेचा शोध घेता येतो, याचे ठोस उदाहरण ठरली आहे.
