प्रांताधिकारी कार्यालयाच्या नावाने पैशांची मागणी केल्याचा आरोप; एसीबीच्या कारवाईने प्रशासकीय वर्तुळात खळबळ
राजकारण मीडिया | फलटण :दिनांक:01/09/2026:प्रभाकर करचे: फलटणच्या प्रशासकीय वर्तुळात खळबळ उडवून देणारी मोठी कारवाई लाचलुचपत प्रतिबंधक विभागाने केली आहे. प्रांताधिकारी कार्यालयात प्रलंबित असलेल्या फेरफार रद्द अपीलातील विलंबमाफीचा अर्ज मंजूर करून घेण्यासाठी आणि संबंधित अपीलाचा निकाल तक्रारदाराच्या बाजूने लावून देण्याचे आमिष दाखवत तब्बल ५० हजार रुपयांची लाच मागितल्याच्या आरोपावरून एका खासगी व्यक्तीला एसीबीने सापळा रचून ताब्यात घेतले आहे.
एसीबीच्या माहितीनुसार, विकास शंकर तोडकर (वय ३६, रा. नांदल, ता. फलटण) या खासगी व्यक्तीविरुद्ध ही कारवाई करण्यात आली. तक्रारदाराच्या फेरफार रद्द अपीलाच्या प्रकरणात काम करून देण्याच्या मोबदल्यात लाचेची मागणी करण्यात आल्याचा आरोप आहे. पडताळणीदरम्यान ५० हजार रुपये प्रांताधिकारी कार्यालयातील कामासाठी आणि निकालानंतर स्वतःसाठी अतिरिक्त रक्कम मागितल्याचे एसीबीने नमूद केले आहे.
लॉ कॉलेजसमोर एसीबीचा सापळा; ५० हजार स्वीकारताना कारवाई
३१ ऑगस्ट रोजी फलटणच्या गिरवी चौक परिसरात लॉ कॉलेजसमोर एसीबीच्या सातारा पथकाने पंचांसमक्ष सापळा रचला. या कारवाईत संबंधित खासगी व्यक्तीला ५० हजार रुपयांची रक्कम स्वीकारताना ताब्यात घेण्यात आल्याचे वृत्त आहे. पुढील कायदेशीर कारवाईची प्रक्रिया सुरू करण्यात आली आहे.
महत्त्वाची कायदेशीर बाब — आरोप आणि दोषसिद्धी यात फरक
या प्रकरणात एसीबीने केलेली कारवाई आणि तक्रारीतील आरोप यांचा तपास कायद्याच्या चौकटीत होणार आहे. संबंधित व्यक्ती दोषी आहे की नाही, याचा अंतिम निर्णय सक्षम न्यायालयाकडूनच होईल. तसेच, उपलब्ध वृत्तानुसार खासगी व्यक्तीने प्रांताधिकारी कार्यालयातील काम करून देण्याच्या नावाने रक्कम मागितल्याचा आरोप आहे; त्यामुळे कोणत्याही लोकसेवकाविरुद्ध न्यायालयीन दोषारोप सिद्ध झाल्याशिवाय त्यांना दोषी ठरवणे योग्य ठरणार नाही.
राजकारण मीडिया सवाल करतो—
सामान्य नागरिकांच्या शासकीय कामांच्या भोवती दलालांची साखळी तयार होत आहे का?
कामाच्या नावाने पैशांची मागणी करणाऱ्या अशा प्रकारांवर प्रशासन अधिक कठोर पावले उचलणार का?
फलटणमध्ये झालेल्या या कारवाईने मात्र एक स्पष्ट संदेश दिला आहे—
“सरकारी कामाच्या नावावर पैशांचा व्यवहार करण्याचा प्रयत्न केल्यास कायद्याचा फास आवळला जाऊ शकतो!”
