🚩 पालखी मार्गावर प्रशासनाचा सज्जतेचा इशारा! वारकऱ्यांच्या सुविधांबाबत कोणतीही तडजोड खपवून घेतली जाणार नाही!

राजकारण मीडिया:फलटण: दिनांक: ०५/०६/२०२६: प्रभाकर करचे |  संतश्रेष्ठ श्री ज्ञानेश्वर महाराजांच्या आषाढीवारी पालखी सोहळ्याच्या पार्श्वभूमीवर प्रशासनाने तयारीला वेग दिला असून पालखी मार्गावरील सर्व यंत्रणांना सतर्कतेचा इशारा देण्यात आला आहे. पुणे विभागीय आयुक्त शितल तेली-उगले यांनी लोणंद ते फलटण पालखी मार्गाची तसेच विविध पालखी तळांची प्रत्यक्ष पाहणी करून कामांचा आढावा घेतला.

या पाहणीदरम्यान संतोष पाटील, याशनी नागराजन, निखिल पिंगळे यांच्यासह विविध विभागांचे वरिष्ठ अधिकारी उपस्थित होते.

पालखी मार्गावरील अपूर्ण कामे तातडीने पूर्ण करण्याचे आदेश देताना विभागीय आयुक्तांनी स्पष्ट केले की, लाखो वारकऱ्यांच्या सेवेत कोणतीही हलगर्जीपणा अथवा दुर्लक्ष सहन केले जाणार नाही. स्वच्छता, शुद्ध पिण्याचे पाणी, आरोग्य सेवा, अखंड वीजपुरवठा, वाहतूक नियंत्रण आणि सुरक्षा व्यवस्थेचा दर्जा उंचावण्यासाठी संबंधित विभागांनी युद्धपातळीवर काम करावे, अशा कठोर सूचना देण्यात आल्या.

यंदाची आषाढी वारी अधिक शिस्तबद्ध, सुरक्षित आणि सुविधायुक्त करण्यासाठी महसूल, पोलीस, आरोग्य, ग्रामविकास आणि इतर सर्व विभागांनी परस्पर समन्वय राखून काम करावे, असे आवाहन करण्यात आले. वारकऱ्यांच्या सेवेत कोणतीही कमतरता राहू नये, यासाठी प्रशासनाने सर्व यंत्रणा सज्ज ठेवल्याचा विश्वास यावेळी व्यक्त करण्यात आला.

“वारकरी सेवेलाच प्राधान्य; सुविधांमध्ये हलगर्जीपणा करणाऱ्यांवर कारवाई अटळ” असा स्पष्ट संदेश या पाहणीतून प्रशासनाने दिल्याची चर्चा परिसरात सुरू आहे.

🚩 आषाढी वारीचा सोहळा भक्तीचा, तर प्रशासनासाठी जबाबदारीची खरी परीक्षा ठरणार आहे.