राजकारण मीडिया:फलटण: दिनांक:24/10/2026: प्रभाकर करचे |** जिद्द, चिकाटी, कठोर परिश्रम आणि विजयाचे स्वप्न उराशी बाळगून कुस्तीच्या आखाड्यात उतरलेल्या भिकोबानगरच्या युवा मल्लाने राज्यस्तरीय शालेय कुस्ती स्पर्धेत आपल्या दमदार कामगिरीचा ठसा उमटवला आहे. श्री. विठ्ठल माध्यमिक विद्यालय व कनिष्ठ महाविद्यालय, भिकोबानगर येथील विद्यार्थी **चि. यश वैभव फरांदे**राहणार सोमंथळी तालुका फलटण जिल्हा सातारा याने राज्यस्तरीय शालेय कुस्ती स्पर्धेत प्रथम क्रमांक पटकावत सुवर्णयश संपादन केले आहे. या दैदीप्यमान कामगिरीमुळे हरियाणा येथे होणाऱ्या राष्ट्रीय पातळीवरील कुस्ती स्पर्धेसाठी त्याची निवड झाली आहे.
अवघ्या १९ व्या वर्षी ८६ किलो वजनगटात यशने मिळवलेले हे यश म्हणजे केवळ एका खेळाडूचे यश नसून भिकोबानगरच्या क्रीडा क्षेत्राच्या शिरपेचात खोवलेला मानाचा तुरा ठरला आहे. प्रतिस्पर्ध्यांशी दोन हात करताना दाखवलेली जिद्द आणि विजयासाठी केलेल्या अथक परिश्रमांचे फळ त्याला सुवर्णपदकाच्या रूपाने मिळाले आहे.
ग्रामीण भागातील गुणवत्तेला योग्य संधी आणि प्रोत्साहन मिळाल्यास राष्ट्रीय स्तरावरही आपली मोहोर उमटवता येते, हे यशने आपल्या कामगिरीतून अधोरेखित केले आहे. त्याच्या या यशामुळे विद्यालय, पालक, शिक्षक आणि क्रीडाप्रेमींमध्ये आनंदाचे वातावरण निर्माण झाले आहे.
राज्यस्तरीय आखाडा गाजवल्यानंतर आता यशसमोर राष्ट्रीय पातळीवरील आव्हान उभे ठाकले आहे. हरियाणाच्या कुस्ती आखाड्यातही महाराष्ट्राचा झेंडा अभिमानाने फडकविण्याची संधी त्याला मिळाली आहे.
**मेहनत, संघर्ष आणि यशाचा नवा आदर्श निर्माण करणाऱ्या या युवा मल्लाचे सर्व स्तरांतून हार्दिक अभिनंदन होत असून, राष्ट्रीय स्पर्धेतील त्याच्या पुढील वाटचालीस शुभेच्छांचा वर्षाव होत आहे.**
